الشاعر/ عمر أحمد عبد العزيز
مستاهلكيش..مستاهلش حبك ليا
ولا استاهل عيونك النعسانين ديا
ولا رموشك الكحيلة
ولا شعرك اللي بيطير على خدك بلا حيلة
مستاهلكيش والله
مستاهلكيش وعارف كده كويس
عارف اني فلاتي بتعجبني كل يوم واحدة
مرة بيضة ومرة سمرة ومرة شقرة
وكل مرة برجع اقولك فيها اخر مرة
وانتي بتعدي وتسامحي يا ولداه مع انك مدبوحة من جوة
مستاهلكيش لاني اناني
بعمل كل حاجة نفسي عايزاها
بفرض عليكي قيود وحدود
وانا على العكس مفيش اي حاجة ربطاني
في أوقات فرحك بكون وياكي
وفي أوقات حزنك بسلاكي
معلش أصلي في الشغل
معلش مع اصحابي
معلش مع اهلي
معلش مع نفسي
بغيب مهما اغيب
وارجع الاقيكي زي ما انتي
اقول هتثور ..هتقول يسقط يسقط
بس ما بيحصلش وما بسقطش
عملتي كل حاجة معايا تتعمل
وعمرك ماقولتيلي في يوم مفيش فيك امل
حقيقي مقدرتكيش
بالرغم اني بحبك جدا
اه والله بحبك جدا
بس طبعي للاسف زي اغلب الرجالة
عيني زايغة وفيا حتة ندالة
شكله ذنب و مكتوب على حوا لحد يوم القيامة
بس كفياكي كده
كفياكي تدي ومتاخديش
كفياكي تقوليلي تستاهل اكتر من كده
وانا في الأصل مستاهلكيش