آلمك كسر قلمى
فجبت سن جديد
وحلفت 100 حلفان
لاخلى ألمك عيد
حزنك ألم همى
فحضرت ف المواعيد
بصيت لنن العين
ما يبقى هم جديد
آلمك كسر نفسى
خلانى اتحسر
مين جتله الجراءه
للقلب ده يكسر
ويشوف دموع العين
ف الننى محبوسه
مكتومه زى الامل
خايفه من الدوسه
خايفه رجول العته
ترميها ف الحوسه
وتدق 100 مسمار
وتشد اوتارها
تنهشها بالأفكار
تسرق ف اسرارها
تدفنها ف الحرمان
وتشيل حيطان دارها
وتعرى راسها بغبا
تفضح ف اسرارها
خليكى ف الكتمان
دمعك بقى فكرتى
وخطوتى الأولى
دمعك بقى همتى
هابنيها بسهوله
دمعك ف ايدى سلاح
للنصره ليكى وبس
طرزت من احساسى
مليار شعور يتحس
دمعك بقى صوتى
هاصرخ ف كل الخلق
يافكره لاتموتى
عودك هايبقى مقام
هايلفه نور صوتى
وينادى كل البشر
ف وجودنا ما تموتى
دمعك صحيح مانزلش
لكنه دمّعنا
وحزنك اللى انكوى
بالهمه جمعنا
من النهارده افرحى
حزنك مالوش معنى
هانخلى سبب الألم
يقعد ويسمعنا
ونحسره بالبكا
ويموت بلا معنى