ما هو مش عريس يا مّاي وخلاص ولا هو يقول عاوز أتجوز يا بوي وعاوز عروسه حلوة تسمع الكلام، والحب جمعكم و خلاص .
بصي وإسمعيني يا بنتي وبص وإسمعني يا إبني الجواز مش بس تحبوا بعض و خلاص الحب مش كفاية علشان نعمل بيت، الحكاية ما إنتهتش عند كده وخلاص، لا في أركان كتير يتبني عليها الجواز، أولها الصدق والصراحة والإحترام، وشوية حاجات فوق بعض علشان البيت يقوم علی أساس متين مش كله تمثيل في تمثيل علی ما تتم الجوازة قبل العريس ما يطير.
أو أهل العروسة يعرفوا إنك بياع مناديل، وإنك مش عنتر ولا الهلالي أبوزيد .
أول شئ شوفوا هينفع تكونوا أصحاب أو لا شوف الإنسانة دي تنفع تكون صحبتي ،شوفي الإنسان ده ينفع يكون صحبي ، هنقدر نحكي ونفضفض من غير خوف أو تكليف.
بعدين نيجي للشئ الأهم، للأخلاق والدين والأصل الطيب، و ياتری الإنسان ده ينفع يكون أب لأولادي؟؟
و ياتری الإنسانة دي تنفع تكون أم لأولادي، إختار وردة من وسط بستان عطرها بيفوح في كل مكان، مش وردة وسط خرابة، دور علی النبت والأصل الطيب، كله بيعود عليك وعلی اللي حواليك وعلی عيالك.
وإنتي إختاري راجل يصونك ويقدر قيمتك ويشيلك جوه عنيه الإتنين.
أهم شئ بلاش نتصنع خصوصا البنت اللي بتمثل الهدؤ والحياء والصوت الهادئ وأنها ما خرجتش من باب البيت
وإن وإن وكله تصنع وتفضلي تتدلعي وتعملي طعمة ورقيقة وبسكوتة وبعد الجواز ما يتم ترجعي لطبعك، حتی ما بتحاوليش تكوني كده فعلا أو تتغيري علشان تكملي، وكتير بنشوف ما فيش عندك إختيار صحيح أهو عريس وأتجوز قبل صحبتي وخلاص والحق قبل ما يفوت القطار، تبقي عارفه إنه سليط اللسان و مافيش فكر ولا ينفع أبو العيال ولاعنده خوف عليكي ولا بيتقي الله فيكي، وبتكملي للأسف وتقولي عريس يا ماي.
وهو كمان شاف عروسة حلوة وفيها كل المواصفات ده لإنك مثلتي عليه دور الكمال، للأسف بعد الجواز شاف إنسانة غريبة خالص عن اللي عرفها ساعتها إما بكتشف إنك ضحكتي عليه أو يتهم أختك وأمك وصحبتك إنهم غيروكي عليه.
للأسف ده اللي بيحصل، في بعض الحالات، أكيد طبعا في ناس واضحة وسوية من البداية وعارفين إن التصنع أخرته فشل الجوازة، ومش الفستان والفرح والشبكة الغالية والمظاهر والشكليات كل ده أساس.
الأساس تتقوا الله في بعضكم تكون نظرتكم لبعيد مُحزن
جدا لما نشوف أفراح فخمة وضخمة وبعد شهر نلاقي طلاق وخراب .
بلاش تصنُع خليكم علی طبيعتكم هتلاقوا صدقوني اللي يمشي معاكم ومع طبعكم أو إتغيروا وغيروا فعلا من طبعكم للأحسن، أصل الحكاية مش جوازة وخلاص،
أو عريس يا مّااي